როგორ შეიძლება მივიღო კრიტიკა გიორგი ვაშაძისგან ან იაგო ხვიჩიასგან, რომლებიც მუშაობდნენ იუსტიციის სამინისტროში მაშინ, როცა იუსტიციის მინისტრი იყო ზურაბ ადეიშვილი, რომელმაც საბჭოთა 30 - დღიანი ადმინისტრაციული პატიმრობა 90 დღემდე გაზარდა, - ამის შესახებ საპარლამენტო უმრავლესობის წევრმა სოზარ სუბარმა ჟურნალისტებთან ადმინისტრაციულ სამართალდარღვევათა კოდექსში ცვლილებებთან დაკავშირებით განაცხადა.
როგორც მან აღნიშნა, არანაირი საფუძველი ვეტოს დადების არ არსებობს, რადგან კანონპროექტის შინაარსი არის დემოკრატიული.
"ეს არის აბსოლუტურად დემოკრატიული და გაცილებით რბილი, ვიდრე შეიძლება ყველაზე ლიბერალური კანონმდებლობა ითვალისწინებდეს ამას აშშ- ის ნებისმიერ შტატში თუ ევროპის ნებისმიერ დემოკრატიულ სახელმწიფოში.
რაც შეეხება კრიტიკას, როცა მაგალითად, ლევან იოსელიანი ან არასამთავრობო ორგანიზაცია აკრიტიკებს, შეიძლება ჩავთვალოთ, რომ ისინი გულწრფელები არიან, შეიძლება არ დავეთანხმოთ მათ, მაგრამ გულწრფელობაში ეჭვი არ შევიტანოთ, მაგრამ როცა მას ყოფილი თუ მოქმედი „ნაციონალები“ უწოდებენ მას საბჭოთა და რეპრესიულ დოკუმენტს და ცვლილებებს, ეს არის არასწორი და ისინი უბრალოდ იტყუებიან, რადგან როგორ შეიძლება მივიღო კრიტიკა გიორგი ვაშაძისგან ან იაგო ხვიჩიასგან, რომლებიც მუშაობდნენ იუსტიციის სამინისტროში მაშინ, როცა იუსტიციის მინისტრი იყო ზურაბ ადეიშვილი, რომელმაც საბჭოთა 30 დღიანი ადმინისტრაციული პატიმრობა გაზარდა 90 დღემდე და ჩვენ ეს 90 დღე შევამცირეთ 15 დღემდე. ეს არის განსხვავება ჩვენს შორის", - განაცხადა სუბარმა.