ბულგარეთის პრეზიდენტმა რუმენ რადევმა ხელი მოაწერა განკარგულებას ქვეყანაში ვადამდელი საპარლამენტო არჩევნების 11 ივლისს ჩატარების შესახებ, - ამის შესახებ ინფორმაციას ბულგარეთის პრეზიდენტის პრესსამსახური ავრცელებს.
„ამ განკარგულებით პრეზიდენტი 12 მაისიდან 45-ე მოწვევის ეროვნულ ასამბლეას დაითხოვს. სახელმწიფოს მეთაურმა საპარლამენტო არჩევნების თარიღად მიმდინარე წლის 11 ივლისი დაასახელა,“- აცხადებენ პრეზიდენტის პრესსამსახურში.
შეგახსენებთ, რომ მიმდინარე წლის 4 აპრილს ჩატარებულ არჩევნებში პრემიერ-მინისტრ ბოიკო ბორისოვის პარტიამ - „მოქალაქეები ბულგარეთის ევროპული განვითარებისთვის“ - გაიმარჯვა, თუმცა უმრავლესობა ვერ მოიპოვა, რის გამოც, კოალიციური მთავრობის ჩამოყალიბება გახდა საჭირო, რაც ვერც ბორისოვმა და მოგვიანებით ვერც არჩევნებში მეორე და მესამე ადგილზე გასული პარტიების - "არის ასეთი ხალხი" და „სოციალისტური პარტიის“ - ხელმძღვანელებმა ვერ მოახერხეს.