ინდოეთში, გასული დღე-ღამის განმავლობაში, კორონავირუსის 362 727 ახალი შემთხვევა გამოვლინდა და ინფიცირებულთა საერთო რაოდენობამ 23.7 მილიონს მიაღწია, - შესაბამის მონაცემებს ქვეყნის ჯანდაცვის სამინისტრო ავრცელებს.
ამავე მონაცემების თანახმად, კოვიდ 19-ს ქვეყანაში კიდევ 4 120 ადამიანის სიცოცხლე ემსხვერპლა და დაღუპულთა რიცხვმა 258 317-ს მიაღწია.
„ინდოეთის სამედიცინო კვლევების საბჭოში“ აცხადებენ, რომ იმ რაიონებში, სადაც დაინფიცირების მაჩვენებელი 10% -ზე მეტია, საჭიროა, „ლოქდაუნი“ ძალაში მომავალი 6-8 კვირის განმავლობაში დარჩეს. აღსანიშნავია, რომ ბოლო დღეების განმავლობაში ინდოეთის მდინარეებმა ბიჰარის, უტარ-პრადეშისა და მადჰია პრადეშის შტატებში ათობით ცხედარი გამორიყეს. დაღუპულები, სავარაუდოდ, კოვიდ 19-ით გარდაცვლილები არიან და გვამები მდინარეში იმის გამო აღმოჩნდნენ, რომ კრემაციისთვის განკუთვნილი ადგილები გადატვირთულია, ან ნათესავებმა მათი კრემაციისთვის საჭირო შეშის შოვნა ვერ შეძლეს.