თეთრი სახლის მრჩეველმა ეროვნული უსაფრთხოების საკითხებში ჯეიკ სალივანი სომხეთისა და აზერბაიჯანის ლიდერებს, ნიკოლ ფაშინიანსა და ილჰამ ალიევს ტელეფონით ესაუბრა, - ამის შესახებ ინფორმაციას თეთრი სახლი ავრცელებს.

თეთრი სახლის განცხადებაში აღნიშნულია, რომ სატელეფონო საუბრების დროს სალივანმა შეშფოთება გამოხატა ორ ქვეყანას შორის არსებული დაძაბულობის გამო.

„მან ხაზი გაუსვა, რომ სამხედრო გადაადგილებები არადემარკირებულ საზღვრებთან უპასუხისმგებლო და პროვოკაციული ქმედებაა", - აცხადებენ თეთრ სახლში.

სალივანმა ასევე "ხაზი გაუსვა, რომ ორმა ქვეყანამ უნდა გამართოს ფორმალური მსჯელობა მათი საერთაშორისო საზღვრის დემარკაციისთვის", - ნათქვამია განცხადებაში.

შეგახსენებთ, გასულ კვირაში სომხეთმა აზერბაიჯანი საზღვრის დარღვევაში დაადანაშაულა. სომხეთის თავდაცვის სამინისტროს მტკიცებით აზერბაიჯანელმა სამხედროებმა სიუნიქის რაიონში სომხეთის სახელმწიფო საზღვარი გადაკვეთეს. აზერბაიჯანმა ბრალდება უარყო და განაცხადა, რომ მისი ძალები მხოლოდ საზღვრის თავიანთ მხარეს იცავდნენ.