ენტონი ბლინკენი - აშშ მხარს უჭერს ისრაელის უფლებას, დაიცვას საკუთარი თავი

აშშ-ის სახელმწიფო მდივნის, ენტონი ბლინკენის განცხადებით, შეერთებული შტატები მხარს უჭერს ისრაელის უფლებას დაიცვას საკუთარი თავი და ასევე აქტიურად ჩაერთვება ღაზას სექტორის აღდგენასა და კონფლიქტის პოლიტიკურ გადაჭრაში.

„პრეზიდენტმა ბაიდენმა აქ ჩამოსვლა ოთხი მიზეზის გამო მთხოვა: ისრაელის უსაფრთხოების მიმართ შეერთებული შტატების ერთგულების დემონსტრირების მიზნით, უფრო მეტი სტაბილურობისთვის მუშაობის, ღაზაში გადაუდებელი ჰუმანიტარული რეკონსტრუქციისა და პალესტინის ხელმძღვანელობასა და ხელისუფლებასთან ჩვენი ურთიერთობების აღდგენის გაგრძელების მიზნით,“- განაცხადა ბლინკენმა ისრაელის პრემიერ-მინისტრ ბენიამინ ნეთანიაჰუსთან შეხვედრის შემდეგ გამართულ ერთობლივ პრესკონფერენციაზე.

მისი თქმით, შეერთებული შტატები ღაზას სექტორში ინვესტიციების განხორციელებას გეგმავს.

„ჩვენ ვიცით, რომ ძალადობის დაბრუნების თავიდან ასაცილებლად, ცეცხლის შეწყვეტის შედეგად შექმნილი სივრცე უნდა გამოვიყენოთ იმისთვის, რომ გამოწვევების უფრო ფართო სპექტრის, მათ შორის ღაზაში ჰუმანიტარული კრიზისის, დასაძლევად და აღდგენის დასაწყებად ვიმუშაოთ. დღეს აშშ-ის მნიშვნელოვან წვლილის შესახებ გამოვაცხადებთ. ჩვენ ვიმუშავებთ ჩვენს პარტნიორებთან იმის უზრუნველსაყოფად, რომ „ჰამასმა“ დახმარებიდან სარგებელი არ ნახოს,“- განაცხადა ბლინკენმა.

„ჩვენ ასევე უნდა ვიმუშაოთ, რომ გავზარდოთ შესაძლებლობა ღაზაში და დასავლეთ სანაპიროზე. მსგავსი ინვესტიციები ხელს შეუწყობს უფრო სტაბილური გარემოს შექმნას, რომელიც სარგებელს მოუტანს პალესტინელებსაც და ისრაელელებსაც,” - დასძინა აშშ-ის სახელმწიფო მდივანმა.

შეგახსენებთ, ენტონი ბლინკენი ისრაელში დღეს ჩავიდა. ახლო აღმოსავლეთის ტურნეს ფარგლებში ის დასავლეთ სანაპიროს, კაიროსა და ამანსაც ესტუმრება.