ავსტრიის უმსხვილესი ავიაკომპანია Austrian Airlines-ის ვენა-მოსკოვის რეისი გაუქმდა, რადგან, მისი თქმით, რუსეთის ხელისუფლებამ არ დაამტკიცა თვითმფრინავის მარშრუტის ცვლილება, რაც ბელარუსის საჰაერო სივრცის გვერდის ავლას გულისხმობდა - ინფორმაციას „ფრანს-პრესი“ ავრცელებს.
სამგზავრო-სატვირთო რეისი OS601 ვენადან მოსკოვში იყო დაგეგმილი, მაგრამ დომოდედოვოს აეროპორტმა რეისი გაუქმებულად გამოაცხადა. მანამდე კი ავსტრიულმა ავიაკომპანიამ უარი თქვა ბელარუსის საჰაერო სივრცის გავლით მოსკოვში ჩასვლაზე - იტყობინება „დოიჩე ველე“. Austrian Airlines-ის წარმომადგენელმა განაცხადა, რომ ფრენის ახალი მარშრუტის დადასტურება საჭიროა რუსეთის ხელისუფლებასთან.
„რუსეთის ხელისუფლებამ ნებართვა არ მოგვცა“, - აღნიშნა მან.
ავსტრიის ტრანსპორტის სამინისტრომ ასევე დაადასტურა, რომ ფრენა გაუქმებულია. მანამდე ევროკავშირმა მის სივრცეში მოქმედ ყველა გადამზიდავს მოუწოდა, თავი აარიდონ ბელარუსის ტერიტორიის თავზე გადაფრენას.