ჯანდაცვის მსოფლიო ორგანიზაცია აცხადებს, რომ კორონავირუსის პანდემიის წარმოშობის დადგენის პროცესს ძირს პოლიტიკა უთხრის.

„მთელი ეს პროცესი პოლიტიკით იწამლება,“- განაცხადა ჯანდაცვის მსოფლიო ორგანიზაციის საგანგებო სიტუაციების ხელმძღვანელმა მაიკლ რაიანმა.

მისი თქმით, იმისთვის, რომ კოვიდ 19-ის წარმოშობის დადგენის კუთხით წარმატების მიღწევა მოხდეს, მეცნიერება და პოლიტიკა ერთმანეთისგან უნდა გამოიყოს.

“გვინდა გთხოვოთ, რომ ჩვენ მეცნიერებას პოლიტიკისგან გამოვყოფთ და მოდით, საჭირო პასუხების მიღების კუთხით წარმატებას სათანადო, პოზიტიურ ატმოსფეროში მივაღწიოთ,"- აღნიშნა მაიკლ რაიანმა.

შეგახსენებთ, რამდენიმე დღის წინ აშშ-ის პრეზიდენტმა ჯო ბაიდენმა სადაზვერვო სამსახურებს დაავალა შეესწავლათ, კოვიდ 19 რომელიმე ცხოველიდან გაჩნდა თუ უხანის ლაბორატორიიდან. მანამდე კი ცნობილი გახდა, რომ აშშ-ის სადაზვერვო სააგენტოები იკვლევენ ინფორმაციას იმის შესახებ, რომ უხანის ლაბორატორიის სამი მკვლევარი 2019 წლის ნოემბერში კოვიდ 19-ის პირველი შემთხვევების დაფიქსირებამდე ერთი თვით ადრე გრიპის მსგავსი დაავადებით ავად გახდა და საავადმყოფოში გადაიყვანეს. ამასთან, ჯერჯერობით დადგენილი არ არის, იყო თუ არა ეს დაავადება კოვიდ 19.