თუ „ნაციონალურ მოძრაობას" უნდა საკუთარი ამომრჩეველი გაუგებრობაში ამყოფოს, ეს მისი არჩევანია და არ წაადგებათ, - ამის შესახებ „გირჩის“ დეპუტატმა სანდრო რაქვიაშვილმა „ნაციონალური მოძრაობის“ პარლამენტში შესვლის და შარლ მიშელის დოკუმენტზე ხელმოწერაზე უარის თქმის საკითხის კომენტირებისას განაცხადა.

მისი თქმით, „ნაციონალურმა მოძრაობამ" უკვე გამოიყენა ის პუნქტი, რომელზეც ამბობენ, რომ არ მოსწონთ და ამის გამო შარლ მიშელის დოკუმენტს ხელს არ აწერენ.

„მოხარული ვარ, რომ როგორც იქნა, „ნაციონალური მოძრაობა" პარლამენტში შემოდის. ის, რომ შარლ მიშელის დოკუმენტს ხელს არ აწერენ, უცნაურია, რადგან ამ შეთანხმებიდან ყველა პუნქტს აღიარებენ, სადაც გაწერილი იყო გირაოს საკითხი, რეფორმებზეა საუბარი და 43- პროცენტიან დათქმაზე, თუ ყველა პუნქტს აღიარებს, არ მესმის, ხელი რატომ არ უნდა მოაწეროს. თუ ამნისტია არ მოსწონს, ამნისტია ჩაწერილი იყო იმ პუნქტში, სადაც გირაოს საკითხი იყო. თუ იმ პუნქტს იყენებ, ეს როგორ გამოდის? "- განაცხადა რაქვიაშვილმა.