მსოფლიოს უდიდესმა ხორცის გადამამუშავებელმა კომპანია JBS-მა აშშ-ის მთავრობას მიაწოდა ინფორმაცია, რომ კომპანიის წინააღმდეგ განხორციელებული ჰაკერული თავდასხმის უკან, რამაც ჩრდილოეთ ამერიკასა და ავსტრალიაში ხორცის წარმოება ჩაშალა, დგას კრიმინალური ორგანიზაცია, რომელიც, სავარაუდოდ, რუსეთშია განთავსებული, - Reuters-ის ინფორმაციით, ამის შესახებ თეთრმა სახლმა განაცხადა.
თეთრი სახლის პრესსპიკერის კარინ ჟან-პიერეს თქმით, შეერთებული შტატები რუსეთის მთავრობას დაუკავშირდა და ფაქტს „ეფბიაი“ იძიებს.
„თეთრი სახლი უშუალოდ თანამშრომლობს რუსეთის მთავრობასთან ამ საკითხთან დაკავშირებით და უგზავნის შეტყობინებას, რომ პასუხისმგებელი სახელმწიფოები კიბერ კრიმინალებს არ მფარველობენ,“- აღნიშნა პრესსპიკერმა.
ცნობისათვის, JBS-ზე კიბერ შეტევა კვირას განხორციელდა. კომპანიის ინფორმაციით, თავდასხმამ ჩრდილოეთ ამერიკასა და ავსტრალიაში მათი IT სისტემები დააზიანა. გუშინ კომპანიაში განაცხადეს, რომ პრობლემის მოგვარებაში მნიშვნელოვან პროგრესს მიაღწიეს და კომპანიის ქარხნების "აბსოლუტური უმრავლესობა" მუშაობას ოთხშაბათიდან განაახლებს.