ჩინეთის გუანდუნის პროვინციაში, კორონავირუსით ინფიცირების შემთხვევების დაფიქსირების გამო შეზღუდვები მკაცრდება. მედიის ინფორმაციით, გასული დღე-ღამის განმავლობაში ჩინეთში კორონავირუსის 10 ახალი ლოკალური შემთხვევა გამოვლინდა და ათივე გუანდუნის პროვინციაში დაფიქსირდა, აქედან შვიდი პროვინციის დედაქალაქ გუანჯოუში, სამი კი - ახლომდებარე ქალაქ ფოშანში.
21 მაისიდან 1 ივნისამდე პერიოდში გუანჯოუსა და ფოშანში, საერთო ჯამში, ინფიცირების 47 შემთხვევა დადასტურდა. აღნიშნულ ქალაქებში ზოგიერთ დასახლებულ ტერიტორიაზე მოქალაქეებს საკუთარ სახლებში კარანტინში ყოფნა ევალებათ, მათ კი, ვისაც ქალაქების თვითმფრინავით, მატარებლით ან ავტობუსით დატოვების სურვილი აქვთ, ბოლო სამი დღის განმავლობაში ჩატარებული ტესტის უარყოფითი პასუხის წარდგენას სთხოვენ.
ცნობისათვის, ჩინეთში, გასული დღე-ღამის განმავლობაში, კორონავირუსის 24 ახალი შემთხვევა გამოვლინდა. პანდემიის დაწყების დროიდან კი ქვეყანაში, საერთო ჯამში, 91 146 ადამიანი დაინფიცირდა, აქედან 4 636 - გარდაიცვალა.