აშშ-ის პრეზიდენტი ჯო ბაიდენი ყურადღებით ადევნებს თვალს ინფორმაციას, რომლის თანახმადაც აშშ-ის ბიზნესზე კიბერ თავდასხმაში რუს ჰაკერებს ადანაშაულებენ, - ამის შესახებ თეთრი სახლის პრესსპიკერმა ჯენ ფსაკიმ განაცხადა.

”პრეზიდენტმა, კიბერ თავდასხმის მზარდი საფრთხის მოსაგვარებლად, სწრაფი სტრატეგიული მიმოხილვა დაიწყო, “- აღნიშნა პრესსპიკერმა.

მისი თქმით, პრეზიდენტი ბაიდენი მიიჩნევს, რომ მის რუს კოლეგას, ვლადიმერ პუტინს აქვს როლი ამ თავდასხმების შეჩერებასა და აღკვეთაში.

„პრეზიდენტი ბაიდენი, რა თქმა უნდა, ფიქრობს, რომ პრეზიდენტ პუტინს და რუსეთის მთავრობას აქვთ როლი ამ თავდასხმების შეჩერებასა და აღკვეთაში,” - აღნიშნა ფსაკიმ.

მისი თქმით, კიბერ შეტევის საკითხი, სავარაუდოდ, ერთ-ერთი იქნება იმ საკითხებს შორის, რომლებსაც პრეზიდენტი ბაიდენი ვლადიმერ პუტინთან დაგეგმილ შეხვედრაზე განიხილავს.

„ჩვენ ველით, რომ ეს იქნება ერთ – ერთი საკითხი, რომელსაც პრეზიდენტი პრეზიდენტ პუტინს სამიტზე განიხილავს ”, - აღნიშნა პრესსპიკერმა.

შეგახსენებთ, მსოფლიოს უდიდესმა ხორცის გადამამუშავებელმა კომპანია JBS-მა აშშ-ის მთავრობას მიაწოდა ინფორმაცია, რომ კომპანიის წინააღმდეგ განხორციელებული ჰაკერული თავდასხმის უკან, რამაც ჩრდილოეთ ამერიკასა და ავსტრალიაში ხორცის წარმოება ჩაშალა, დგას კრიმინალური ორგანიზაცია, რომელიც, სავარაუდოდ, რუსეთშია განთავსებული. მანამდე კიბერ თავდასხმა განხორციელდა ამერიკულ ნავთობსადენ Colonial Pipeline-ზე, რის შედეგადაც რამდენიმე დღის განმავლობაში საწვავი არ მიეწოდებოდა ამერიკის აღმოსავლეთ შტატებს. ამ თავდასხმაში ფედერალურმა საგამოძიებო ბიურომ რუსი ჰაკერები დაადანაშაულა.