ავსტრია მიესალმება შეერთებული შტატების გადაწყვეტილებას Nord Stream 2 გაზსადენის პროექტში ჩართული კომპანიების წინააღმდეგ სანქციების დაწესებაზე უარის თქმის შესახებ, - ამის შესახებ ავსტრიის კანცლერმა სებასტიან კურცმა რუსულ სააგენტო TASS-თან ინტერვიუში განაცხადა.

მისივე თქმით, გაზსადენის მშენებლობა ვენის ეკონომიკურ ინტერესებშია.

„ძალიან მოხარული ვარ, რომ შეერთებული შტატები სანქციებით აღარ ემუქრება Nord Stream 2-ის პროექტში მონაწილე კომპანიებს. გერმანიის მსგავსად, ჩვენ კვლავ ვაგრძელებთ Nord Stream 2-ის მხარდაჭერას, რადგან ეს ჩვენს ეკონომიკურ ინტერესებში შედის", - აღნიშნა კანცლერმა.

მან ხაზი გაუსვა, რომ Nord Stream 2 მიზნად ისახავს ევროპული ენერგომომარაგების მარშრუტების დივერსიფიკაციას, ანუ ხელს უწყობს „ევროპის ენერგეტიკული უსაფრთხოების უზრუნველყოფას".

შეგახსენებთ, Nord Stream 2-ის პროექტი ევროპისთვის რუსული გაზის ბალტიის ზღვის გავლით, უკრაინის გვერდის ავლით მიწოდებას ითვალისწინებს. დასავლეთში შიშობენ, რომ შესაძლოა, რუსეთმა ის მოსკოვზე დამოკიდებულების გაზრდის გზით ევროკავშირის ქვეყნების შესუსტების ბერკეტად გამოიყენოს.