ღრმად დამამწუხრა ქალბაჯარის რაიონში ნაღმზე აფეთქების შედეგად 3 აზერბაიჯანელი მშვიდობიანი მოქალაქის, მათ შორის 2 ჟურნალისტის, დაღუპვის შესახებ ინფორმაციამ, - ამის შესახებ აზერბაიჯანის საგარეო საქმეთა მინისტრი ჯეიჰუნ ბაირამოვი სოციალურ ქსელ „ტვიტერში“ წერს.

მინისტრი სომხურ მხარეს მოუწოდებს, აზერბაიჯანს დანაღმული ველების რუკები გადასცეს.

„მოვუწოდებთ სომხეთს, გადმოგვცეს დანაღმული ველების რუკები. ისინი ამ თხოვნის შესრულებაზე ყოველ დღე უარს ამბობენ, რითაც კიდევ უფრო მეტი ადამიანის სიცოცხლეა საფრთხეში“, - წერს მინისტრი.

აზერბაიჯანული მედიის ინფორმაციით, ქალბაჯარის რაიონში ავტობუსი, რომელშიც ჟურნალისტები ისხდნენ, ტანკსაწინააღმდეგო ნაღმზე აფეთქდა, რასაც 3 ადამიანის სიცოცხლე ემსხვერპლა. დაღუპულებს შორის ორი ჟურნალისტია - ტელევიზია AzTV-ის ოპერატორი სირაჯ აბიშოვი და საინფორმაციო სააგენტო Azertag-ის თანამშრომელი მაჰერამ იბრაჰიმოვი.