კომპანია Facebook-მა აშშ-ის ყოფილი პრეზიდენტის, დონალდ ტრამპის გვერდის დაბლოკვა მინიმუმ 2023 წლის იანვრამდე გაახანგრძლივა.

როგორც კომპანიაში აცხადებენ, ტრამპის ქმედებებით დაირღვა მათი რეგულაციები, რის გამოც ახალი პროტოკოლის შესაბამისი უმაღლესი სასჯელი დაიმსახურა.

„ჩვენ მის გვერდს ვბლოკავთ 2 წლით, რომელიც ამოქმედდა მიმდინარე წლის 7 იანვრიდან. 2023 წლის შემდეგ ტრამპს Facebook-ით სარგებლობა შეეძლება, თუკი საზოგადოებრივი უსაფრთხოების რისკი მოიხსნება. Facebook გაახანგრძლივებს აკრძალვას, თუკი რისკი კვლავ სერიოზული იქნება“, - აცხადებენ კომპანიაში.

Facebook– მა განაცხადა, რომ მათ მიიღეს სამეთვალყურეო საბჭოს შეფასება იმის შესახებ, რომ მათი მოდერირების პოლიტიკა ზედმეტად პირობითია. მაისში Facebook-ის სამეთვალყურეო საბჭომ, რომელიც გადაწყვეტილებებს იღებს იმის შესახებ, თუ რა სახის კონტენტის გამოქვეყნება ან წაშლა შეუძლია Facebook-სა და Instagram-ს საკუთარი პლატფორმებიდან, აშშ-ის ყოფილი პრეზიდენტის დონალდ ტრამპის საქმეზე დასკვნა გამოაქვეყნა. საბჭო მხარს უჭერდა სოციალურ ქსელში ტრამპის დაბლოკვას, თუმცა მისი გადაწყვეტილებით, Facebook-ის მხრიდან არამართებული იყო „ბუნდოვანი და სტანდარტების შეუსაბამო სასჯელის დაკისრება დონალდ ტრამპის გვერდის განუსაზღვრელი ვადით დაბლოკვასთან დაკავშირებით“. Facebook-მა იმჟამინდელი პრეზიდენტის, დონალდ ტრამპის ანგარიში განუსაზღვრელი ვადით 7 იანვარს დაბლოკა, რადგან ის კაპიტოლიუმზე თავდასხმის მონაწილეთა შესაძლო წაქეზებაში დაადანაშაულა.