დედოფალს, უელსის პრინცსა და კორნუოლის ჰერცოგინიას, ასევე კემბრიჯის ჰერცოგსა და ჰერცოგინიას აცნობეს და აღფრთოვანებული არიან ამ ახალი ამბით, - ამის შესახებ ბუკინგემის სასახლის განცხადებაშია აღნიშნული, სადაც პრინც ჰარის და მეგან მარკლის ახლადდაბადებული გოგონას შესახებაა საუბარი.
ამასთან, პრინც ჰარის მამამ, პრინცმა ჩარლზმა და კორნუალის ჰერცოგინიამ წყვილს გოგონას შეძენა „ტვიტერში“ მიულოცეს.
“ვულოცავთ ჰარის, მეგანს და არჩის ლილიბეტ დაიანას შეძენას. ყველას ვუსურვებთ საუკეთესოს ამ განსაკუთრებულ დროს,” - აღნიშნულია მილოცვაში.
მისალოცი პოსტი გამოაქვეყნეს პრინცმა უილიამმა და კემბრიჯის ჰერცოგინიამაც.
„ყველა აღფრთოვანებული ვართ პატარა ლილის დაბადების ბედნიერი ამბით,“- აღნიშნულია მილოცვის ტექსტში.
შეგახსენებთ, დიდი ბრიტანეთის პრინცს, ჰარის და მის მეუღლეს, მეგან მარკლს ქალიშვილი - ლილიბეთ „ლილი“ დაიანა მოუნთბათენ უინდზორი შეეძინათ. გოგონა პარასკევს, 11:40 საათზე, კალიფორნიის სანტა ბარბარას საავადმყოფოში დაიბადა.