კოალიცია მედიის ადვოკატირებისთვის” წარმომადგენლის ნათია კაპანაძის განცხადებით, აშშ-ის სახელმწიფო მდივნის მოადგილის მოვალეობის შემსრულებელ, ფილიპ რიკერსა და ადვოკატირების ჯგუფის შეხვედრაზე საქართველოში მედიის თავისუფლებასთან დაკავშირებით იმსჯელეს. როგორც მან ჟურნალისტებს განუცხადა, ორმხრივი ინტერესია, რომ საქართველოში მედია გარემო გაუმჯობესდეს.
ის იმედოვნებს, რომ დღევანდელი შეხვედრის შედეგები მედიაზე დადებითად აისახება.
„მოხარული ვარ, რომ დღევანდელ შეხვედრაზე მოისმინეს მედიის პრობლემები, რაზეც კოალიცია „მედიის ადვოკატირებისთვის“ არაერთხელ მოუწოდებს ხოლმე ხელისუფლებას, რომ გადაჭრას, მათ შორის არის ჟურნალისტებისა და მედია ორგანიზაციების დამოუკიდებლობა, სამართლიანი სასამართლოს უფლებით სარგებლობა, ცხადია, ასევე არის ის, რომ გამოძიებული იყოს ის დანაშაულები, რაც ჟურნალისტების წინააღმდეგ მოხდა და ხდება ჩვენს ქვეყანაში. რა თქმა უნდა, არის მარეგულირებელი კომისია, რომელიც მნიშვნელოვანი აქტორია მედიის თავისუფლების საკითხებში. იმედი გვაქვს, ის მოსაზრებები, რაც დღევანდელ შეხვედრაზე გავცვალეთ, უკვე დადებითად აისახება მედიის მდგომარეობაზე. ვფიქრობ, ხელისუფლებისთვის იქნება მნიშვნელოვანი წინაპირობა, გადადგას სწრაფი ნაბიჯები, მათ შორის შეწყვიტოს ბოიკოტირების რეჟიმი მედიასთან“,- განაცხადა კაპანაძემ.
ცნობისთვის, საქართველოში ვიზიტად მყოფი ამერიკის შეერთებული შტატების სახელმწიფო მდივნის მოადგილის მოვალეობის შემსრულებელი, ფილიპ რიკერი მედიის თავისუფლებასთან დაკავშირებით ადვოკატირების ჯგუფების წარმომადგენლებს შეხვდა.