სომეხი ჯარისკაცი, რიგითი არტურ კატანიანი აზერბაიჯანის შეიარაღებული ძალების მიერ კონტროლირებად ტერიტორიაზე მხოლოდ იმიტომ აღმოჩნდა, რომ მან ნისლის გამო ორიენტაცია დაკარგა, - ამის შესახებ სომხეთის თავდაცვის სამინისტროს მიერ გავრცელებულ განცხადებაშია აღნიშნული.
მათივე ინფორმაციით, აზერბაიჯანის თავდაცვის სამინისტროს განცხადება, რომ კატანიანი “დივერსანტია”, სინამდვილეს არ შეესაბამება.
შეგახსენებთ, აზერბაიჯანის თავდაცვის სამინისტროს განცხადებით, სომხეთ-აზერბაიჯანის საზღვარზე სომხეთის შეიარაღებული ძალების სადაზვერვო-დივერსიული ჯგუფის წევრი დააკავეს, რომელიც აზერბაიჯანის ტერიტორიაზე, ლაჩინის რაიონში შეიჭრა. მათი მტკიცებით, პირველადი გამოძიების შედეგად დადგინდა, რომ სადაზვერვო-დივერსიული ჯგუფის სავარაუდო მიზანი აზერბაიჯანის ტერიტორიაზე დანაღმვითი სამუშაოების განხორციელება იყო.