საფრანგეთის პრეზიდენტს ემანუელ მაკრონს მოსახლეობასთან შეხვედრის დროს ერთ-ერთმა მოქალაქემ სილა გააწნა, - ამის შესახებ ინფორმაციას Reuters-ი ავრცელებს.
სააგენტოს ცნობით, ინციდენტი მაშინ მოხდა, როდესაც პრეზიდენტი, საფრანგეთის სამხრეთ ნაწილში, დრომის რეგიონში რესტორნის მფლობელებსა და სტუდენტებთან შეხვედრას მართავდა და მათ კოვიდ 19-ისგან გამოწვეულ პრობლემებზე ესაუბრებოდა.
მედიის ინფორმაციით, მაკრონმა ერთ-ერთ მოქალაქეს ჩამოსართმევად ხელი გაუწოდა, მამაკაცმა კი დაიყვირა: „ძირს მაკრონი“ და პრეზიდენტს სილა გააწნა.
მაკრონის დაცვის წევრებმა მამაკაცი მიწაზე დააწვინეს, პრეზიდენტი კი მისგან მოშორებით გაიყვანეს. ტელეკომპანია BFM TV-ის ცნობით, ინციდენტთან დაკავშირებით ორი პირია დაკავებული.