ბატონო ირაკლი, ვინ ვინ და თქვენ ნუ გვეტყვით პარლამენტის შენობაზე შეტევაზე - ადამიანი, რომელიც იმ პოლიტიკურ ჯგუფს წარმოადგენდით, ვინც საქართველოს პირველ პრეზიდენტს ტყვიებს უშენდა, - ამ განცხადებით ფრაქცია „ნაციონალური მოძრაობის“ წევრმა დავით კირკიტაძემ დეპუტატ ირაკლი ქადაგიშვილს, პარლამენტის პლენარულ სხდომაზე მიმართა.
როგორც კირკიტაძემ ქადაგიშვილის პასუხად განაცხადა, მისმა საუბარმა იმ წლებისკენ გადაიყვანა, რომლის გახსენებაც არ სურდა.
„როცა საუბრობთ, რომ 20 ივნისს პარლამენტის შენობაში შემოჭრა გვინდოდა, ნუღარ გაგვახსენებთ უახლოეს წარსულს. გვახსოვს ყველაფერი! აქ იყვნენ ადამიანები, რომელთაც მშობლები და აუხლოესი ადამიანები დაეღუპათ. იმ ტკივილს ნუღარ გაგვახსენებთ, ზუსტად ვინ მოახდინა აი ამ შენობაში შემოჭრა, რამ დააზარალა საქართველო და რამ დაახევინა ქვეყანას უკან. გავრილოვი კი არა, იმის წინამორბედებით - როდიონოვებით და გრაჩოვებით მოდიოდით ზვიად გამსახურდიაზე - მართლა ყველაფერს აქვს საზღვარი. ვინ ნახეთ პარლამენტის შენობაში 20 ივნისს შემოჭრილი?! ან რა გვინდოდა ამ შენობაში, გულწრფელად მინდა დაგაჯეროთ, რომ ამას არავინ აპირებდა. 20 ივნისს ხალხი ღირსების დასაცავად გამოვიდა“, - განაცხადა დავით კირკიტაძემ ირაკლი ქადაგიშვილის საპასუხოდ.
პარლამენტში, კამათისა და მხარეებს შორის პოლიტიკური ბრალდებების ფონზე, ფრაქცია "ქართული ოცნების" ავტორობით წარდგენილი “ამნისტიის შესახებ“ პროექტის განხილვა მიმდინარეობს. პროექტს მეორე მოსმენით, მუხლობრივად იხილავენ.
„ქართული ოცნების“ კანონის პროექტით, სისხლისსამართლებრივი პასუხისმგებლობისა და სასჯელისაგან, ასევე პირობითი მსჯავრისგან თავისუფლდება ყველა პირი, რომელმაც 2019 წლის 19-21 ივნისის მოვლენებთან დაკავშირებით ჩაიდინა დანაშაული და უარს არ აცხადებს მის მიმართ ამნისტიის გავრცელებაზე.