როგორ და რატომ აღმოჩნდა გავრილოვი იქ?! კი, გადადგა ადამიანი, ბატონი კობახიძე. შუა საუკუნეებში თავებს ჭრიდნენ ჩვენი მეფეები ასეთებს, მაგრამ მადლობა ღმერთს ახლა, არ არის შუა საუკუნეები, მაგრამ ეს არასაკმარისია, - ამის შესახებ ოპოზიციონერმა დეპუტატმა გუბაზ სანიკიზემ პარლამენტის პლენარულ სხდომაზე განაცხადა.
სანიკიძემ მიმართა უმრავლესობის წევრს ირაკლი ქადაგიშვილს, დახმარებოდა დაზუსტებაში, თუ როგორ და რატომ აღმოჩნდა რუსი დეპუტატი სერგეი გავრილოვი პარლამენტის თავმჯდომარის სავარძელში.
„კოლეგებო, ვაზუსტებ. მშვიდად, წყნარად. ამ დარბაზში ყველაზე დიდი ხანია ვისაც ვიცნობ, ეს არის ირაკლი ქადაგიშვილი. ირაკლი, ძალიან გთხოვ, იქნებ, მომეხმარო დავაზუსტოთ ეს შეკითხვა ჩვენ კოლეგებთან. მე შეფასება არ მიკითხავს გავრილოვის თემაზე, მე თვითონ პროცედურა მაინტერესებს, როგორ და რატომ აღმოჩნდა იქ. ეს არის ჩემთვის მთავარი შეკითხვა, იმიტომ, რომ ამაზე პასუხი გაცემული არ არის, მეგობრებო. ვერ გავიგე, რატომ გეშლებათ ნერვები? როგორ და რატომ აღმოჩნდა იქ? კი ბატონო, გადადგა ადამიანი, ბატონი კობახიძე. შუა საუკუნეებში თავებს ჭრიდნენ ჩვენი მეფეები ასეთებს, მაგრამ მადლობა ღმერთს ახლა არ არის შუა საუკუნეები, მაგრამ ეს არასაკმარისია. როგორ აღმოჩნდა სახელმწიფო სიმბოლოზე, მთავარ სავარძელში, ზვიადის სავარძელში საქართველოს მოძულე. ამაზე გამეცით პასუხი თქვენი შეფასებები არ მაინტერესებს, მე“- განაცხადა სანიკიძემ
რაც შეეხება ირაკლი ქადაგიშვილის პასუხს, როგორც მან განმარტა, 2019 წელს, როდესაც სერგეი გავრილოვი თბილისში ჩამოვიდა, იმ დროს პარლამენტის წევრი არ იყო, თუმცა როგორც მოქალაქე დაინტერესდა, როგორ აღმოჩნდა გავრილოვი პარლამენტში. საბოლოო ჯამში, ამ კითხვაზე, ქადაგიშვილმა სრული პასუხის გაცემა ვერ მოახერხა, რადგან რეგლამენტით გათვალისწინებული სასაუბრო დრო ამოიწურა, რაზეც პარლამენტის თავმჯდომარემ უთხრა, რომ დროის შემდეგი დამატების შემთხვევაში მიეცემოდა სრულად პასუხის გაცემის შესაძლებლობა.