ამნისტიის თაობაზე მმართველი გუნდის პროექტი არის ნაღმი, რომელიც შეინარჩუნა „ქართულმა ოცნებამ“ იმისთვის, რომ არ ვისაუბროთ ხალხის გაჭირვებაზე, ეკონომიკურ პრობლემებსა და კვლავ პოლიტიკურ კინკლაობას დაეთმოს დრო, - ამის შესახებ „სტრატეგია აღმაშენებლის“ ლიდერმა, გიორგი ვაშაძემ ჟურნალისტებთან განაცხადა.
როგორც მან აღნიშნა, მმართველი გუნდის მიერ მომზადებული კანონპროექტის ჩანაწერი უარის თქმის პრინციპზე, პოლიტიკური კინკლაობისთვის ტოვებს ადგილს.
„ამნისტიის კანონპროექტის ამ კონკრეტულ ჩანაწერს დავარქვათ „კობახიძის ნოუჰაუ“. ეს ეწინააღმდეგება ყველაფერს და ტოვებს ადგილს პოლიტიკური კინკლაობისთვის. ვწუხვარ, რომ უმრავლესობის პრიორიტეტი არის არა ხალხი, არამედ პოლიტიკური კინკლაობა. გუშინ ჩვენ გამოვედით კონკრეტული ინიციატივით და უკვე დავიწყებთ ინდივიდუალურად ყველა დეპუტატთან მუშაობას, რომ სრულად მოხდეს ღირსეული კომპენსაცია ყველა დაზარალებული ადამიანის, ვინც 20 ივნისს დაზიანდა და ეს მაინც გააკეთოს ქართულმა პოლიტიკურმა სპექტრმა, რომ ყველამ ავიღოთ პასუხისმგებლობა ამ ადამიანების მკურნალობაზე და მათ კომპენსაციაზე, დანარჩენს დრო გვიჩვენებს,“ - განაცხადა ვაშაძემ.