მსოფლიო ლიდერები ისრაელში ახალი მთავრობის დამტკიცებას ეხმიანებიან

მსოფლიო ლიდერები ისრაელში ახალი მთავრობის დამტკიცებას ეხმიანებიან. გერმანიის კანცლერი ანგელა მერკელი აცხადებს, რომ მოუთმენლად ელის ისრაელის ახალ პრემიერ-მინისტრთან, ნაფტალი ბენეტთან, მჭიდრო თანამშრომლობას.

„გერმანიასა და ისრაელს ერთმანეთთან უნიკალური მეგობრობა აკავშირებთ და ჩვენ ამ მეგობრობის კიდევ უფრო განმტკიცება გვსურს. ამის გათვალისწინებით, მოუთმენლად ველი თქვენთან მჭიდროდ თანამშრომლობას“, - ნათქვამია ანგელა მერკელის განცხადებაში.

ავსტრიის კანცლერი სებასტიან კურცი ნაფტალი ბენეტს პრემიერ-მინისტრის პოსტის დაკავებას ულოცავს და აცხადებს, რომ მოუთმენლად ელოდება მასთან მუშაობას.

„ავსტრია ისრაელის, როგორც ებრაული და დემოკრატიული სახელმწიფოს ერთგულია და მის გვერდით დარჩება”, - წერს კურცი „ტვიტერზე“.

ნაფტალი ბენეტსა და იაირ ლაპიდს ახალი მთავრობის ფორმირებას გაერთიანებული სამეფოს საგარეო საქმეთა მინისტრი, დომინიკ რააბიც ულოცავს. მისი თქმით, მოუთმენლად ელის გაერთიანებულ სამეფოსა და ისრაელს შორის „უსაფრთხოების, ვაჭრობისა და კლიმატის ცვლილების საკითხებზე თანამშრომლობას და რეგიონში მშვიდობის უზრუნველყოფის მიზნით მათთან ერთად მუშაობას.“

კანადის პრემიერ-მინისტრის, ჯასტინ ტრუდოს განცხადებით, მას ნაფტალი ბენეტსა და იაირ ლაპიდთან თანამშრომლობის დიდი სურვილი აქვს. მისი თქმით, ორი ქვეყნის ლიდერებმა უნდა გამონახონ „კანადასა და ისრაელს შორის ურთიერთობების კიდევ უფრო განმტკიცების გზები”, მათ შორის ორმხრივი სავაჭრო ხელშეკრულების საფუძველზე. ჯასტინ ტრუდომ ასევე მადლობა გადაუხადა ნეთანიაჰუს „წლების განმავლობაში მნიშვნელოვანი პარტნიორობისთვის".

პალესტინის პრეზიდენტის მაჰმუდ აბასის ადმინისტრაციაში აცხადებენ, რომ მთავრობის ცვლილება ისრაელის შიდა პოლიტიკის საკითხია და პალესტინის მოთხოვნები იგივე რჩება.

„ეს არის ისრაელის შიდა საქმე. ჩვენი პოზიცია ყოველთვის მკაფიო იყო. ჩვენ გვსურს პალესტინის სახელმწიფო 1967 წლის საზღვრებში, რომლის დედაქალაქი იერუსალიმი იქნება“, - განაცხადა აბასის პრესსპიკერმა ნაბილ აბუ რუდეინემ.

ისრაელში ახალი მთავრობის ფორმირებას ეხმიანება ბენიამინ ნეთანიაჰუ და აცხადებს, რომ ხელისუფლებაში მალე დაბრუნდება.

„ჩვენ დავბრუნდებით - და უფრო სწრაფად, ვიდრე თქვენ ფიქრობთ”, - წერს ნეთანიაჰუ „ტვიტერში.“

შეგახსენებთ, ისრაელს ახალი პრემიერ-მინისტრი ჰყავს. 12-წლიანი მმართველობის შემდეგ, ბენიამინ ნეთანიაჰუ ისრაელის პრემიერ-მინისტრის თანამდებობაზე ნაფტალი ბენეტიმ შეცვალა. ისრაელის „ქნესეთში“ ნაფთალი ბენეტის მთავრობას მხარი 60-მა დეპუტატმა დაუჭირა, 59 კი - წინააღმდეგ წავიდა.

ემილ ავდალიანი - ყველაფერი რეგიონში საქართველოს უფრო მზარდ როლზე მოასწავებს, საჭიროა მხოლოდ შექმნილი ვითარების სწორად გამოყენება
ქართული პრესის მიმოხილვა 18.08.2022
ალექსეი გარანი - პუტინს უნდა რომ უკრაინა დათმობებზე წავიდეს, მაგრამ უკრაინა მშვიდობის სანაცვლოდ, ქვეყნის ტერიტორიულ მთლიანობასთან დაკავშირებული საკითხებით ვაჭრობას არ აპირებს
"გალფის" ინიციატივით 100 პირველკურსელს, რომელმაც ერთიან ეროვნულ გამოცდებში უმაღლესი ქულები მიიღო, ერთწლიანი ყოველთვიური სტიპენდია დაენიშნება
„საქართველოს ბანკის“ აქციების ღირებულება რეკორდულ მაქსიმუმზეა
„ევროპელი სოციალისტების” წევრები, დავით ზილფიმიანი და ზაზა მიქაძე ერთობლივ განცხადებას ავრცელებენ
კომპანია PSP ფარმაცევტული სექტორის განვითარებაზე კონცენტრირდება და არაპროფილური ბიზნესებიდან გამოდის