ბრიუსელში დღეს აშშ-ევროკავშირის სამიტი გაიმართება, - ამის შესახებ ევროკავშირის საბჭოს ოფიციალურ ვებგვერდზეა აღნიშნული. შეხვედრაზე ევროკავშირის მხრიდან წარმოდგენილი იქნებიან ევროპული საბჭოს პრეზიდენტი შარლ მიშელი და ევროკომისიის პრეზიდენტი ურსულა ფონ დერ ლაიენი.

სამიტში აშშ-ის მხრიდან მონაწილეობას მიიღებს პრეზიდენტი ჯო ბაიდენი. ლიდერები განიხილავენ საკითხთა ფართო სპექტრს, როგორიცაა - კორონავირუსი, კლიმატი, ვაჭრობა და ინვესტიციები, ტექნოლოგიები, საგარეო საკითხები და საერთო ღირებულებები.

სამიტის დასასრულს ევროკავშირისა და აშშ-ის ლიდერები ერთობლივ განცხადებას გამოაქვეყნებენ.