საფრანგეთში კოვიდ 19-ით ინფიცირების შემთხვევების 2-4%-ი „დელტა“, ე.წ. „ინდურ ვარიანტზე“ მოდის, - მედიის ინფორმაციით, ამის შესახებ საფრანგეთის ჯანდაცვის მინისტრმა ოლივერ ვერანმა განაცხადა.
მისი თქმით, ეს ნიშნავს, რომ ქვეყანაში, ყოველდღიურად „ინდური შტამით“ ინფიცირების 50-150 შემთხვევა დასტურდება.
„ჩვენ ვირუსისა და პანდემიის განადგურების პროცესში ვართ და არანაირად არ უნდა დავუშვათ, რომ ინდურმა ვარიანტმა პანდემიის კიდევ ერთი ტალღა გამოიწვიოს,” - განაცხადა მინისტრმა.
ცნობისათვის, ბოლო ორი თვის განმავლობაში საფრანგეთში კოვიდ 19-ით ინფიცირების შემთხვევები სტაბილურად შემცირდა. პანდემიის დაწყების დროიდან ქვეყანაში, საერთო ჯამში, 5.7 მილიონი ადამიანი დაინფიცირდა, აქედან ვირუსს 110 454 პაციენტის სიცოცხლე ემსხვერპლა.