აშშ-ის პრეზიდენტ ჯო ბაიდენსა და რუსეთის პრეზიდენტ ვლადიმერ პუტინს შორის 16 ივნისს, ჟენევაში, დაგეგმილი შეხვედრისთვის პროტოკოლით, დაახლოებით 5 საათია გათვალისწინებული.

შეხვედრის დღის წესრიგს რუსული მედია კრემლის პრესსამსახურზე დაყრდნობით ავრცელებს.

მათივე ცნობით, ადგილობრივი დროით 13:00 საათზე აშშ-ის, რუსეთის და შვეიცარიის პრეზიდენტების - ჯო ბაიდენის, ვლადიმერ პუტინისა და გი პარმელენის ერთობლივი ფოტოსესია იგეგმება. 13:15 საათზე დაიწყება აშშ-ისა და რუსეთის პრეზიდენტების მოლაპარაკებები შენობის პირველ სართულზე, ბიბლიოთეკის ოთახში. 14:30 საათზე დაგეგმილია რუსულ-ამერიკული მოლაპარაკებების დაწყება გაფართოებული შემადგენლობით. 16:15 საათზე დაიწყება მოლაპარაკებების მეორე ნაწილი გაფართოებული ფორმატით. თეთრმა სახლმაც და კრემლმაც დაადასტურეს, რომ ლიდერები ერთობლივ პრესკონფერენციას არ გეგმავენ. ამის ნაცვლად, ისინი შეხვედრის შედეგებზე ცალ-ცალკე ისაუბრებენ. პუტინის პრესკონფერენციის დაწყება დაგეგმილია 18:00 საათზე. პრეზიდენტების შეხვედრას ვილა ლა გრანჟი უმასპინძლებს. მე-18 საუკუნის ვილა ქალაქის უდიდეს პარკში, ჟენევის ტბის სანაპიროზე მდებარეობს. ჯო ბაიდენი ჟენევაში უკვე ჩაფრინდა.