„ქართული ოცნება“ შეეცდება, ოპოზიციას მათი ჭკუით ყველაზე მარტივი კომიტეტები გადასცეს, მაგრამ რა კომიტეტიც არ უნდა იყოს, როგორც კი საკომიტეტო მექანიზმი ოპოზიციის ხელში იქნება, მერე ნახეთ სამუშაო პროცესი პარლამენტში - ჩვენთვის, ოპოზიციისთვის, ყველა კომიტეტი პრიორიტეტია, - ამის შესახებ „სტრატეგია აღმაშენებლის“ ლიდერმა გიორგი ვაშაძემ განაცხადა.

ამასთან, ვაშაძე პარლამენტის იმ კომიტეტებს ასახელებს, რომლის ხელმძღვანელის თანამდებობა ოპოზიციონერი დეპუტატის აზრით, ოპოზიციას უნდა დაეთმოს. ვაშაძის თქმით ეს კომიტეტებია: საფინანსო-საბიუჯეტო კომიტეტი, თავდაცვის და უშიშროების კომიტეტი, ადამიანის უფლებათა დაცვის კომიტეტი.

„არა ჩვენი მოთხოვნით, არამედ ჩვენი ევროპელი და ამერიკელი პარტნიორების ძალისხმევით შარლ მიშელის შეთანხმების დოკუმენტში ჩაიწერა, რომ ოპოზიციას პარლამენტში კონკრეტული პოზიციები უნდა ჰქონდეს, რათა განსხვავებული აზრი უფრო მკაფიოდ წარმოადგინოს. ვფიქრობ, ამ თემაზე დისკუსია უახლოეს პერიოდში დაიწყება. ოპოზიცია მეტ ბერკეტს აიღებს, რომ ეს მათრახი, წკეპლა ხელში დავიჭიროთ და ეს უქნარა, არაფრისმაქნისი მთავრობა და უმრავლესობა ამოვქოქოთ და ხალხის წინაშე ანგარიშვალდებულები გავხადოთ. ვფიქრობ, უახლოეს ერთ კვირაში ამაზე დისკუსია უნდა დაიწყოს“, - განაცხადა გიორგი ვაშაძემ.