რუსეთის პრეზიდენტის ვლადიმერ პუტინის განცხადებით, ის დააკმაყოფილა ამერიკის პრეზიდენტის ჯო ბაიდენის განმარტებამ, მისი მისამართით გაკეთებულ მკვეთრ განცხადებებთან დაკავშირებით.

„მკვეთრ განცხადებებთან დაკავშირებით: აბა რა გითხრათ, ჩვენ ყველამ ვიცით ეს განცხადება. ამის შემდეგ ბაიდენმა დამირეკა, ერთმანეთს განვუმარტეთ და მე მისმა განმარტებამ დამაკმაყოფილა. მან შეხვედრა შემომთავაზა - ეს მისი ინიციატივაა და ჩვენ შევხვდით“, - განაცხადა პუტინმა ბაიდენთან შეხვედრის შემდეგ გამართულ პრესკონფერენციაზე.

პუტინმა დღევანდელ ბრიფინგზე განაცხადა, რომ აშშ-მა რუსეთი თავის მტრად ჯერ კიდევ 2017 წელს გამოაცხადა და გადაწყვიტა, პოლიტიკურ ორგანიზაციებს რუსეთში მხარი დაუჭიროს.

„ამერიკის შეერთებული შტატების კანონმდებლობაში შეტანილია დებულება იმის შესახებ, რომ ამერიკამ მხარი უნდა დაუჭიროს დემოკრატიული მმართველობის წესებსა და წესრიგს ჩვენ ქვეყანაში და მხარი დაუჭიროს პოლიტიკურ ორგანიზაციებს“, - განაცხადა ვლადიმერ პუტინმა.

ცნობისთვის, ჯო ბაიდენმა რამდენიმე თვის წინ, რუსეთის ლიდერს ვლადიმერ პუტინს მკვლელი უწოდა.