ნატო - რუსეთი წლობით უარს ამბობდა „ღია ცის შეთანხმების“ ვალდებულებების სრულად შესრულებაზე, მათ შორის, კალინინგრადის ოლქის თავზე და რუსეთ-საქართველოს საზღვართან ახლოს ფრენებზე არასათანადო შეზღუდვების დაწესებით

ნატო ეხმაურება რუსეთის საგარეო უწყების მიერ გავრცელებულ ინფორმაციას, რომლის თანახმადაც, ქვეყანა „ღია ცის შეთანხმებას“ 18 დეკემბერს დატოვებს. ჩრდილოატლანტიკური საბჭოს მიერ გავრცელებული განცხადების თანახმად, რუსეთი წლობით უარს ამბობდა „ღია ცის შეთანხმების“ ვალდებულებების სრულად შესრულებაზე, მათ შორის, კალინინგრადის ოლქის თავზე და რუსეთ-საქართველოს საზღვართან ახლოს ფრენებზე არასათანადო შეზღუდვების დაწესებით.

„ჩვენ ღრმა წუხილს გამოვხატავთ რუსეთის გადაწყვეტილებასთან დაკავშირებით, „ღია ცის შეთანხმებიდან“ გასვლის შესახებ. ეს არის მნიშვნელოვანი სავალდებულო იურიდიული ინსტრუმენტი, რომელიც ხელს უწყობს გამჭვირვალობას, უსაფრთხოებასა და სტაბილურობას, ასევე ურთიერთნდობას ევრო-ატლანტიკურ რეგიონში.

რუსეთი მრავალი წლის განმავლობაში უარს ამბობდა „ღია ცის შეთანხმებით“ გათვალისწინებული მისი ვალდებულებების სრულად შესრულებაზე, მათ შორის, კალინინგრადის ოლქის თავზე და რუსეთ-საქართველოს საზღვართან ახლოს ფრენებზე არასათანადო შეზღუდვების დაწესებით.

ჩვენ გამუდმებით მოვუწოდებდით რუსეთს დაბრუნებულიყო შეთანხმების სრულ შესაბამისობაში და გადავდგით ბევრი ნაბიჯი. ამის ნაცვლად, რუსეთმა ვერ შეძლო კონსტრუქციული მონაწილეობა და არ გადადგა ნაბიჯები სრულ შესაბამისობაში დაბრუნებისკენ.

ჩვენ ვაგრძელებთ რუსეთთან კონსტრუქციული ურთიერთობისკენ სწრაფვას, როდესაც რუსეთის ქმედებები ამის შესაძლებლობას იძლევა. მოვუწოდებთ რუსეთს გამოიყენოს დარჩენილი ექვსი თვე, სანამ მისი გადაწყვეტილება ძალაში შევა, გადახედოს თავის გადაწყვეტილებას და სრულ შესაბამისობაში დაუბრუნდეს ღია ცის შესახებ ხელშეკრულებას“, - აღნიშნულია განცხადებაში.

აქვე ნათქვამია, რომ იზიარებენ აშშ-ის მიერ მის გადაწყვეტილებაში ნახსენებ წუხილს, რომ რუსეთის ქმედებები მნიშვნელოვანი ფაქტორი იყო 2020 წელს შეთანხმებიდან მისი გასვლის საქმეში.

„ღია ცის შეთანხმების“ თანახმად, რომელიც 2002 წელს მიიღეს და რომლის ხელმომწერი 30-ზე მეტი ქვეყანა, მათ შორის აშშ და რუსეთია, მონაწილე ქვეყნებს შეუძლიათ ერთმანეთის ტერიტორიაზე აწარმოონ შეუიარაღებელი საჰაერო თვალთვალი, მისი მიზანი კი გამჭვირვალობის ზრდა და შეიარაღებების კონტროლია. შეთანხმება ვაშინგტონმა გასულ წელს დატოვა და მიზეზად რუსეთის მიერ ხელშეკრულების პირობების მუდმივად დარღვევა დაასახელა. აშშ-ის სახელმწიფო დეპარტამენტმა მაისში განაცხადა, რომ ქვეყანა „ღია ცის შეთანხმებას“ აღარ დაუბრუნდება. დღეს რუსეთის საგარეო საქმეთა სამინისტრომაც განაცხადა, რომ შეთანხმებას საბოლოოდ, 6 თვეში, ანუ 18 დეკემბერს დატოვებს და შესაბამისი პროცედურები დაწყებულია. რუსეთი მისი გადაწყვეტილების მთავარ მოტივად აშშ-ის მიერ ხელშეკრულებიდან გასვლას ასახელებს.

თენგიზ ფხალაძე - რუსეთის ყველა უკანონო ნაბიჯი მოითხოვს რეაგირებას, მოსკოვმა უნდა გადაიხადოს პოლიტიკური ფასი საქართველოს წინააღმდეგ ჩადენილი ყველა დანაშაულისათვის, დუმილით კი ამას ვერ მივაღწევთ
ქართული პრესის მიმოხილვა 08.08.2022
კახა ოქრიაშვილი აგვისტოს ომის მე-14 წლისთავთან დაკავშირებით განცხადებას ავრცელებს