ჩვენ აუცილებლად უნდა გავმიჯნოთ ერთმანეთისგან პოლიტიკური პროცესები, კულტურა, მეცნიერება, - ამის შესახებ ჟურნალისტებს საპარლამენტო უმრავლესობის წევრმა გურამ მაჭარაშვილმა რუსთაველის თეატრის დასის რუსეთში გამგზავრებასთან დაკავშირებით განუცხადა.

მისივე თქმით, ჩვენ არა ეთნოსს, არამედ ოკუპაციას ვებრძვით.

"ჩვენ არ ვებრძვით ეთნოსს, ჩვენ ვებრძვით ოკუპაციას, ვებრძვით ადამიანის უფლებების დარღვევას. რა თქმა უნდა, ბოლომდე დავიცავთ ქვეყნის ტერიტორიულ მთლიანობას, მაგრამ არცერთ შემთხვევაში ჩვენ არ ვებრძვით არც ეთნოსს, არც კულტურას და არც მეცნიერებას", - განაცხადა მაჭარაშვილმა.

ცნობისთვის, მოსკოვი ჩეხოვის ფესტივალს მასპინძლობს, სადაც სხვადასხვა ქვეყნის თეატრალურ დასებთან ერთად, 27 ივნისს საქართველოც მიიღებს მონაწილეობას. რუსეთის საზოგადოებრივი ტელევიზიის პირველი არხის ინფორმაციით, თბილისის შოთა რუსთაველის სახელობის ეროვნული თეატრი მოსკოვში თავის საპრემიერო სპექტაკლს გამართავს. რუსთაველის თეატრი მოსკოვში რობერტ სტურუას სპექტაკლს „თამაშის დასასრული“ ითამაშებს.