კრემლი შავ ზღვაში, ბრიტანულ გამანადგურებელთან დაკავშირებით მომხდარ ინციდენტს პროვოკაციად აფასებს, - რუსული მედიის ინფორმაციით, შესაბამისი განცხადება კრემლის პრესსპიკერმა დიმიტრი პესკოვმა გააკეთა.
”ჩვენ მიგვაჩნია, რომ ბრიტანულმა გამანადგურებელმა განახორციელა პროვოკაცია. უფრო მეტიც, ჩვენ ვწუხვართ, რადგან ეს იყო წინასწარგანზრახული და მომზადებული პროვოკაცია”, - აღნიშნა პესკოვმა.
მისი თქმით, შავ ზღვაში HMS Defender- ის მოქმედებები საერთაშორისო სამართლის დარღვევაა.
"რა თქმა უნდა, ჩვენ შეშფოთებულნი ვართ ბრიტანული ხომალდის ქმედებებით. მივიჩნევთ, რომ ასეთი ქმედებები მიუღებელია და საერთაშორისო სამართალს არღვევს", - განაცხადა პესკოვმა.
მისი თქმით, რუსეთის მესაზღვრეები და შეიარაღებული ძალები საკმაოდ მკაცრ პოზიციას დაიკავებენ, თუ მომავალში მსგავსი პროვოკაციების მოწყობას შეეცდებიან.