ევროკავშირის 17-მა ქვეყანამ ხელი მოაწერა წერილს, სადაც უნგრეთის მიერ ანტი-LGBT+ კანონის მიღების ფონზე LGBT+ საზოგადოების მიმართ მხარდაჭერას გამოხატავენ,-ინფორმაციას „ევრონიუსი“ ავრცელებს.
„გამოვთქვამთ ერთგულებას ჩვენი საერთო ფუნდამენტური ფასეულობების მიმართ, რომლებიც გათვალისწინებულია ევროკავშირის ხელშეკრულების მე -2 მუხლში. უნდა გავაგრძელოთ ბრძოლა LGBT+ საზოგადოების დისკრიმინაციის წინააღმდეგ და განვამტკიცოთ მათი ფუნდამეტური უფლებების დაცვა. მზად ვართ, გავაგრძელოთ ეს ძალისხმევა და უზრუნველვყოთ, რომ მომავალი ევროპული თაობები გაიზრდებიან თანასწორობისა და პატივისცემის ატმოსფეროში“, - ნათქვამია წერილში, რომესაც ხელს სხვებთან ერთად გერმანიის, საფრანგეთის,იტალიის, ესპანეთის, ბელგიისა და ლატვიის ლიდერებიც აწერენ.
„ევრონიუსი“ წერს, რომ გავრცელებული ინფორმაციით, წერილი წარადგინეს ესპანეთის და ლუქსემბურგის პრემიერ-მინისტრებმა პედრო სანჩესმა და ხავიერ ბეტელმა.