ევროკავშირსა და რუსეთს შორის ახალი დიალოგი უმაღლეს დონეზე შესაძლებელია მხოლოდ იმ შემთხვევაში, თუკი მოსკოვი შეაჩერებს აგრესიულ პოლიტიკას თავისი მეზობლების მიმართ. ამის შესახებ პოლონეთის პრემიერ - მინისტრმა მათეუშ მორავეცკიმ განაცხადა.

მისი თქმით, უმაღლეს დონეზე ნებისმიერი პირდაპირი დიალოგის დასაწყისი მხოლოდ იმ შემთხვევაშია შესაძლებელი, როდესაც ხდება ფაქტობრივი დეესკალაცია და აგრესიული პოლიტიკიდან ფაქტობრივი გამოსვლა.

„ჩვენთვის ერთმნიშვნელოვანი ვითარებაა. როდესაც ვხედავთ ჰიბრიდულ შეტევებს ჩვენ მეზობლებზე, ვფიქრობთ, რომ უკანასკნელი კიბერშეტევის კონტექსტში, ძნელია დიალოგი უმაღლეს დონეზე“ , - განაცხადა მორავეცკიმ.

მანვე ხაზგასმით აღნიშნა, რომ სამიტზე წამოწევს საკითხს უკანასკნელ კიბერშეტევებზე, რომლებიც პოლონელი მაღალჩინოსნების მიმართ განხორციელდა.

ცნობისთვის, გერმანიის კანცლერმა ანგელა მერკელმა ევროკავშირს მოუწოდა, გაიმართოს მოლაპარაკებები უმაღლეს დონეზე რუსეთის პრეზიდენტ ვლადიმერ პუტინთან.