გენერალ-მაიორი გიორგი მათიაშვილი რუმინეთში ოფიციალური ვიზიტით იმყოფებოდა

საქართველოს თავდაცვის ძალების მეთაური ოფიციალური ვიზიტით რუმინეთში იმყოფებოდა.

თავდაცვის სამინისტროს ინფორმაციით, გენერალ-მაიორ გიორგი მათიაშვილის ოფიციალური დახვედრის ცერემონიალი რუმინეთის ეროვნულ თავდაცვის სამინისტროში გაიმართა, რის შემდეგაც ქართველმა გენერალმა რუმინეთის ეროვნული თავდაცვის მინისტრთან ნიკოლაე-იონელ ჩიუკასთან და რუმინელ კოლეგასთან, გენერალ-ლეიტენანტ დანიელ პეტრესკუსთან შეხვედრები გამართა.

უწყების ცნობით, შეხვედრების დროს ხაზი გაესვა საქართველოსა და რუმინეთს შორის თავდაცვის სფეროში არსებულ ორმხრივი თანამშრომლობის მნიშვნელობასა და საქართველოს მიერ მიღწეულ პროგრესს უსაფრთხოების და თავდაცვის რეფორმების განხორციელებაში.

გენერალ-მაიორმა გიორგი მათიაშვილმა ნატო-საქართველოს არსებითი პაკეტის (SNGP) იმპლემენტაციაზე გაამახვილა ყურადღება და არსებითი პაკეტის ძირითადი ჯგუფის საქმიანობაში რუმინული მხარის აქტიური ჩართულობა აღნიშნა. საუბრის ერთ-ერთი თემა იყო შავი ზღვის უსაფრთხოება, სადაც საქართველო, როგორც შავი ზღვის უსაფრთხოების არქიტექტურის განუყოფელი ნაწილი და ნატოს გაძლიერებული შესაძლებლობების პარტნიორი, აგრძელებს ალიანსთან სტრატეგიულ დიალოგს და პრაქტიკული ნაბიჯების განხორციელებას. ამ მხრივ რუმინეთის ეროვნული თავდაცვის მინისტრმა მზადყოფნა გამოხატა შავი ზღვის რეგიონში უსაფრთხოების გაზრდის მიზნით უფრო მჭიდრო თანამშრომლობისთვის და საქართველოს ევრო-ატლანტიკური მისწრაფების გზაზე მხარდაჭერა აღუთქვა.

„რუმინეთი გააგრძელებს საქართველოს თავდაცვის სისტემის რეფორმირების პროცესის მხარდაჭერას ნატოში გაწევრიანების პროცესში მიღებული გამოცდილების შეთავაზებით", - აღნიშნა ნიკოლაე-იონელ ჩიუკამ.

საქართველოსა და რუმინეთის თავდაცვის ძალების მეთაურებმა კი, თავდაცვის სფეროში თანამშრომლობის გაძლიერების შესახებ იმსჯელეს და განსაკუთრებით აღნიშნეს საქართველოსა და რუმინეთში დაგეგმილ მრავალეროვნულ სწავლებებში ერთობლივი მონაწილეობა, სამხედრო განათლების მიმართულება და გამოცდილების გაზიარება სამხედრო წარმოების კუთხით.

„ჩვენ მზად ვართ განვავითაროთ უკვე ტრადიციული ურთიერთობები, რომელიც გვაქვს საქართველოს თავდაცვის ძალებთან, ჩვენს სანდო პარტნიორებთან კავკასიაში. რუმინელი და ქართველი სამხედროები ესწრებიან ერთობლივ წვრთნებს სახმელეთო, საზღვაო და სპეციალური ოპერაციების ძალების სფეროებში. როგორც შავი ზღვის მოსაზღვრე სახელმწიფოები, ჩვენ საერთო ინტერესი გვაქვს ამ რეგიონში უსაფრთხოების და სტაბილურობის უზრუნველსაყოფად. ნატო-საქართველოს ფარგლებში ჩვენს ქვეყნებს შორის არსებული ორმხრივი თანამშრომლობა ჩვენი თავდაცვის ძალებს შორის პარტნიორობის განმტკიცებასა და რეგიონალური უსაფრთხოების გაძლიერებას უწყობს ხელს“, - განაცხადა გენერალ-ლეიტენანტმა დანიელ პეტრესკუმ.

საქართველოს თავდაცვის ძალების მეთაური ბუქარესტში მის მოადგილესთან, ბრიგადის გენერალ ირაკლი ჭიჭინაძესთან ერთად იმყოფებოდა.

ვლადიმერ ფესენკო - უკრაინის გარეშე უკრაინის მომავალზე შეთანხმების ნებისმიერი მცდელობები დამარცხებისთვისაა განწირული
დავით თვალაბეიშვილი - ჩვენ მხარს ვუჭერთ ევროკავშირის ენერგეტიკული გაერთიანების მედიაციის გაგრძელებას და მოვუწოდებთ მასში ჩართულ ყველა მონაწილეს, გამოვიყენოთ ეს შესაძლებლობა
ქართული პრესის მიმოხილვა 23.07.2021
თორნიკე შარაშენიძე - ხელისუფლების სერიოზული შეცდომა იყო ვაშინგტონისთვის არასწორი ინფორმაციის მიწოდებაში აშშ-ს ელჩის დადანაშაულება, შესაძლოა, ეს ამბავი მათ მომავალში ცუდადაც კი დაუბრუნდეთ
პირველად საქართველოში - დავით ტატიშვილის სამედიცინო ცენტრში უნიკალური ოპერაცია ჩატარდა
მინერალური წყალი „ბორჯომი“ ახალ კამპანიას იწყებს
„სინერჯი“ თევზის კომპანია „უმალის“ პარტნიორი გახდა
დავით ტატიშვილის სამედიცინო ცენტრმა ამჯერად ახალი ამბულატორიული ცენტრი აჭარის რეგიონში, ბათუმში გახსნა