დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის განცხადებით, რესპუბლიკურ საავადმყოფოში კორონავირუსის საწინააღმდეგო ვაქცინები არ გაფუჭებულა. როგორც მან დღევანდელ ბრიფინგზე განაცხადა, კლინიკაში ვაქცინებთან დაკავშირებით მცირე ხნით ტემპერატურული რეჟიმის ცვალებადობა დაფიქსირდა, თუმცა, შემოწმების შედეგად დადგინდა, რომ ვაქცინა ვარგისია და მისი ადმინისტრირება მოხდება.

„რესპუბლიკურ საავადმყოფოსთან მიმართებით იყო მცირეხნიანი ტემპერატურული რეჟიმის ცვალებადობა, ამის გამო ჩვენთან კომუნიკაცია იყო, ვაქცინები გადაიტანეს თბილისის საზოგადოებრივი ჯანდაცვის სამაცივრო განყოფილებაში. შემდგომ მოეწყო კონსულტაციები ჯანმრთელობის მსოფლიო ორგანიზიაცის ევროპის რეგიონალურ ოფისთან, ყველა ამონაწერი, ყველა დოკუმენტაცია განიხილეს, ვაქცინა არის ვარგისი და შესაბამისად, მისი ადმინისტრირება მოხდება“,-განაცხადა გამყრელიძემ.