ხელისუფლებასთან ერთად მოქალაქეებმაც უნდა აიღონ პასუხისმგებლობა და აქცია, რომელიც საზოგადოებაში ასეთ დაპირისპირებას იწვევს, უნდა გადაიდოს, - აღნიშნული განცხადება ჟურნალისტებთან პარლამენტის საპროცედურო საკითხთა კომიტეტის თავმჯდომარემ ირაკლი ქადაგიშვილმა გააკეთა. მისივე თქმით, თუ საზოგადოებას არ ექნება პასუხისმგებლობის აღქმის და გაზიარების უნარი, მხოლოდ სახელმწიფო ვერ იქნება ერთადერთი.
„დაახლოებით ათი დღის წინ, ირაკლი კობახიძემ განცხადება გააკეთა, რომ ყველა კონტექსტის გათვალისწინებით თავი შეგვეკავებინა ისეთი აქციების გამართვისგან, რომელიც საზოგადოებაში ძალიან დიდ ვნებათაღელვას გამოიწვევს. ყველასთვის ცნობილი იყო, რომ ეს გამოიწვევდა გარკვეულ ვნებათაღელვას. ამას ვუყურებთ რუსთაველის გამზირზე. სახელმწიფო და შინაგან საქმეთა სამინისტრო მაქსიმალურს გააკეთებენ, რომ მოქალაქეების უსაფრთხოება დაცული იყოს და რაიმე ისეთი ექსცესი არ მოხდეს, რაც დააზიანებს ადამიანებს და უსაფრთხოების პრობლემას შეუქმნის მოქალაქეებს”, - განაცხადა ქადაგიშვილმა ჟურნალისტებთან საუბრისას.
