ჰაკერები, რომლებმაც ამერიკულ კომპანია Kaseya-ზე კიბერ შეტევა განახორციელეს და ამ გზით სულ მცირე 17 ქვეყანაში ასობით კომპანია დააზარალეს, სისტემის აღდგენის სანაცვლოდ, გამოსასყიდის სახით 70 მილიონ აშშ დოლარს ითხოვენ, - ინფორმაციას „დოიჩე ველე“ ავრცელებს.
გამოცემის ცნობით, ჰაკერები გამოსასყიდის ბიტკოინით გადახდას ითხოვენ.
საერთაშორისო IT-კომპანია Kaseya-ზე, რომელიც კომპანიებს თავიანთი IT ინფრასტრუქტურის დისტანციურად მართვაში ეხმარება, ჰაკერებმა კიბერთავდასხმა შაბათს განახორციელეს. კიბერთავდასხმის უკან, სავარაუდოდ, რუსეთთან დაკავშირებული კიბერ კრიმინალური დაჯგუფება REvil-ი დგას.
აშშ-ის პრეზიდენტის ჯო ბაიდენის განცხადებით, თუკი გამოძიება დაადგენს, რომ კრემლი ამ თავდასხმასთან რაიმე ფორმით არის დაკავშირებული, აშშ საპასუხო რეაგირებას მოახდენს.