„თბილისი პრაიდის“ მოწინააღმდეგეთა აქციაზე დაშავებულ, მედიასაშუალებების წარმომადგენლებს შორის ერთ-ერთი ტელეკომპანია "პალიტრანიუსის“ ოპერატორი რომა ტარუღიშვილია.
ტელეკომპანიის ოპერატორს პრაიდის მოწინააღმდეგეები ფიზიკურად გაუსწორდნენ. ასევე, დამტვრეულია კომპანიის კუთვნილი ტექნიკა.
ტარუღიშვილი სასწრაფო-სამედიცინო დახმარების ჯგუფმა „ნიუ ჰოსპიტალსში“ გადაიყვანა. ოპერატორს დაზიანებები სახის არეში აქვს მიყენებული, მათ შორის გატეხილი აქვს ცხვირი.
„სიტუაციას ვიღებდი. ჩემს საქმეს ვაკეთები, როცა დავინახე, რომ ძალიან აგრესიულები იყვნენ. გამოვიქეცი, ამის მერე აღარ დამინახავს, რომელმა და რა ჩამარტყა. ცხვირი მაქვს გატეხილი, თვალიც დაზიანებული“, - აცხადებს ტარუღიშვილი.
ცნობისთვის, თბილისის სასწრაფო-სამედიცნო დახმარების პრესსამსახურის ინფორმაციით, საავადმყოფოში სულ მედიასაშუალებების ორი წარმომადგენელია გადაყვანილი. კლინიკაში გადაყვანა არ დასჭირდათ, თუმცა დაზიანებები მიიღო კიდევ რამდენიმე ოპერატორმა და ჟურნალისტმა.