გერმანია გაერთიანებული სამეფოდან, რუსეთიდან, პორტუგალიიდან, ინდოეთიდან და ნეპალიდან ჩასული მოქალაქეებისთვის კორონავირუსთან დაკავშირებით დაწესებულ სამოგზაურო შეზღუდვებს აუქმებს.
BBC-ის ინფორმაციით, ოთხშაბათიდან აღნიშნული ქვეყნებიდან გერმანიაში ჩასული სრულად ვაქცინირებული მოქალაქეებისთვის 10-დღიანი კარანტინის გავლა სავალდებულო აღარ იქნება. რაც შეეხება არავაქცინირებულ პირებს, მათ კარანტინში ყოფნა მოუწევთ, თუმცა მეხუთე დღეს, კორონავირუსზე ჩატარებულ ტესტზე უარყოფითი პასუხის შემთხვევაში, კარანტინის ნაადრევად დასრულების შესაძლებლობა ექნებათ.
ცნობისათვის, აღნიშნული 5 ქვეყანა, კორონავირუსის „დელტა“ და „დელტა პლუს“ ვარიანტების გავრცელების გამო, გერმანიას „ვირუსის ვარიანტის გავრცელების ზონების“ სიაში ჰყავდა შეყვანილი. რობერტ კოხის ინსტიტუტის განცხადებით, ეს ქვეყნები ახლა კლასიფიცირდება როგორც "მაღალი გავრცელების ზონები".