გერმანიის პროკურატურამ დააკავა და ბრალი წაუყენა მამაკაცს, რომელიც ჩინეთის საიდუმლო სამსახურის სასარგებლოდ ჯაშუშობაშია ეჭვმიტანილი, - ინფორმაციას „დოიჩე ველე“ ავრცელებს.

გამოცემის ცნობით, პოლიტოლოგი, კლაუს ლ. 2001 წლიდან ხელმძღვანელობდა ჰანს სეიდელის ფონდს მიუნხენში. აღნიშნული ფონდი დაკავშირებულია ანგელა მერკელის პარტიის, „ქრისტიან-დემოკრატიული კავშირის“ პარტნიორ პარტია „ბავარიის ქრისტიან-სოციალურ კავშირთან“.

გერმანიის ხელისუფლების მტკიცებით, ჩინეთის საიდუმლო სამსახურის მიერ მისი გადაბირება 2010 წელს იმ პერიოდში მოხდა, როდესაც ის შანხაიში ლექციებს კითხულობდა. ეჭვმიტანილი ჩინეთის სპეცსამსახურებს თანხის სანაცვლოდ გარკვეულ ინფორმაციას აწვდიდა.

გერმანიის საზოგადოებრივი მაუწყებლის ARD– ის ცნობით, კლაუს ლ. იყო ორმაგი აგენტი, რადგან იგი ასევე მუშაობდა გერმანიის სადაზვერვო სამსახურში (BND).

გავრცელებული ინფორმაციით, ეჭვმიტანილს ინფორმაციის შეგროვებაში მას გერმანიის პოლიტიკაში მაღალი დონის კონტაქტები უწყობდა ხელს.