ეს არის მიზანი, რომლითაც უნდათ, რომ შეცვალონ საქართველოს გეოპოლიტიკური ვექტორი - ეს არის თამაში, რომელიც მიმართულია ქვეყნის რუსეთისკენ მოტრიალებისკენ და ევროკავშირის დროშის ჩამოგდება სწორედ ამის გამოხატულება იყო , - ამის შესახებ მედიაექსპერტმა ლაშა ტუღუშმა „პალიტრანიუსის“ გადაცემა „ნიუსრუმში“ განაცხადა.

მისივე თქმით, საქართველოს ადგილი არის დასავლეთის ცივილიზაციაში და არა დასავლეთის ცივილიზაციის მიღმა.

„რა თქმა უნდა, ეს არის რუსული მოვლენა და ეს არის რუსეთის თამაში. ისინი ლაპარაკობენ რუსეთზე, ლაპარაკობენ რუსეთის პოზიტიურ როლზე და მაქსიმალურად ცდილობენ დასავლეთის დისკრედიტაციას. რა თქმა უნდა, ეს არის თამაში, რომელიც მიმართულია ქვეყნის მოტრიალებისკენ და ევროკავშირის დროშის ჩამოგდება სწორედ ამის გამოხატულება იყო. არამარტო დროშის, ასევე შეტევა ჟურნალისტებზე , შეტევა პარტიებზე, შეტევა პარლამენტზე და შეტევა საზოგადოებრივ ორგანიზაციებზე.

ეს არის მიზანი, რომლითაც უნდათ, რომ შეცვალონ საქართველოს გეოპოლიტიკური ვექტორი. სამწუხაროა ინსტრუმენტები, რომელიც ამ შემთხვევაში იყო გამოყენებული. გადაწყვეტილებები უნდა მიიღონ იმ ადამიანებმაც, რომლებიც აღმოჩნდნენ ნებით თუ უნებლიედ, ჩართული ამ პროცესში. ეს ეხება ხელისუფლებას, მათ არაფერი გააკეთეს“ , - განაცხადა ტუღუშმა.

ამასთან, მედიაექსპერტის თქმით, საგამოძიებო კომისია უნდა შეიქმნას და დაიწყოს გამოკვლევა თბილისში ბოლო ორი დღის განმავლობაში განვითარებულ მოვლენებზე.

„მინდა მოვუწოდო პარლამენტს, რომ აუცილებლად უნდა შექმნან საგამოძიებო კომისია და დაიწყონ გამოკვლევა და თუ როგორი ბრძანება იყო პოლიციისთვის მიცემული იმისთვის, რომ პირველივე სიგნალი როგორც კი მიიღეს, რომ ჟურნალისტებს თავს დაესხნენ, რა გააკეთეს ამის შემდეგ. მათ არაფერი არ გაუკეთებიათ იმისათვის, რომ ჟურნალისტები დაეცვათ“ , - განაცხადა ტუღუშმა.