პარლამენტის ევროინტეგრაციის კომიტეტის თავმჯდომარის, მაკა ბოჭორიშვილის განცხადებით, პარლამენტის შენობიდან ევროკავშირის დროშის ჩამოხსნა “სამწუხარო ფაქტი და არასასურველი სურათია”.

ამასთან, როგორც ბოჭორიშვილმა აღნიშნა, პოლიციამ უზრუნველყო, რომ გამოხატვის თავისუფლება მაქსიმალურად დაცული ყოფილიყო.

“მოხდა სამწუხარო ფაქტი და არასასურველი სურათი, რომელიც ვიხილეთ. ევროკავშირის დროშის ჩამოხსნა ქვეყანაში, რომლის მოსახლეობის 80% ისწრაფვის ევროკავშირში ინტეგრაციისკენ, არის არასასურველი და დასაგმობი რამ, თუმცა პოლიციამ გააკეთა ძალიან კარგი საქმე, მათ უზრუნველყვეს, რომ გამოხატვის თავისუფლება მაქსიმალურად ყოფილიყო დაცული, რაც არის ფუნდამენტური უფლება”, - განაცხადა ბოჭორიშვილმა.

ცნობისთვის, გუშინ, მას შემდეგ, რაც პარლამენტის ტერიტორიაზე მდუმარე აქცია დასრულდა და ტერიტორია პრაიდის მოწინააღმდეგეებმა დაიკავეს, მათ საკანონმდებლო ორგანოსთან აღმართული ევროკავშირის დროშა ჩამოხსნეს და დაწვეს.