რუსეთი, ირანი და თურქეთი კიდევ ერთხელ ადასტურებენ თავიანთ ერთგულებას სირიის სუვერენიტეტისა და ტერიტორიული მთლიანობისადმი, - ამის შესახებ ნათქვამია სამი ქვეყნის ერთობლივ განცხადებაში, რომელიც ასტანას ფორმატში გამართული შეხვედრის შემდეგ გამოქვეყნდა.
„რუსეთმა, ირანმა და თურქეთმა დაადასტურეს მტკიცე ერთგულება სირიის არაბული რესპუბლიკის სუვერენიტეტის, დამოუკიდებლობის, ერთიანობისა და ტერიტორიული მთლიანობის, აგრეთვე გაეროს ქარტიის მიზნებისა და პრინციპების მიმართ და ხაზი გაუსვეს, რომ ამ პრინციპების საყოველთაო პატივისცემა და დაცვა აუცილებელია”, - ნათქვამია დოკუმენტში.
რუსეთი, ირანი და თურქეთი ასევე მოუწოდებენ ისრაელს, შეაჩეროს სამხედრო თავდასხმები სირიაში.
”ვგმობთ ისრაელის სამხედრო თავდასხმებს სირიაში, რომლებიც არღვევს საერთაშორისო სამართალს, საერთაშორისო ჰუმანიტარულ კანონს, სირიისა და მეზობელი ქვეყნების სუვერენიტეტს, საფრთხეს უქმნის რეგიონში სტაბილურობასა და უსაფრთხოებას და მოვითხოვთ ამ თავდასხმების შეწყვეტას,“ - აღნიშნულია დოკუმენტში.
მხარეებმა ასევე ხაზი გაუსვეს, რომ სირიის კონფლიქტი სამხედრო გზით ვერ გადაიჭრება.