განათლების ხარისხის განვითარების ეროვნულ ცენტრსა და საქართველოს საზღვაო ტრანსპორტის სააგენტოს შორის ურთიერთანამშრომლობის მემორანდუმი გაფორმდა. ამის შესახებ ინფორმაციას განათლების ხარისხის განვითარების ეროვნული ცენტრი ავრცელებს.

მათივე ინფორმაციით, მემორანდუმის მიზანია საზღვაო ტრანსპორტის სერვისების მიწოდების საკითხებში კვალიფიციური ადამიანური რესურსის მომზადების, არსებული სპეციალისტებისათვის კვალიფიკაციის დადასტურების მხარდაჭერა და ამ მიმართულებით განათლების ხარისხის გაზრდა.

„მხარეები, თავიანთი კომპეტენციის ფარგლებში ითანამშრომლებენ სხვადასხვა მიმართულებით, მათ შორის: საზღვაო სფეროში პროფესიული და უმაღლესი კვალიფიკაციების განახლების, პროფესიული მომზადებისა და გადამზადების პროგრამების შემუშავება-დანერგვის, საგანმანათლებლო დაწესებულებების შესაძლებლობების გაძლიერების, საზღვაო სფეროში პროფესიული საგანმანათლებლო სტანდარტების და უმაღლესი განათლების დარგობრივი მახასიათებლების შემუშავებისა და განვითარების მიმართულებით.

ასევე, საზღვაო სფეროში საგანმანათლებლო პროგრამების ავტორიზაციასთან, აკრედიტაციასთან, ასევე პროფესიული მომზადების და/ან პროფესიული გადამზადების პროგრამების უფლების მოპოვებასთან ან უფლების დადასტურებასთან დაკავშირებულ ადმინისტრაციული წარმოების საკითხებზე.

მემორანდუმს განათლების ხარისხის განვითარების ეროვნული ცენტრის დირექტორმა თამარ მახარაშვილმა და ეკონომიკის სამინისტროს საზღვაო ტრანსპორტის სააგენტოს დირექტორმა თამარ იოსელიანმა მოაწერეს ხელი“, - ნათქვამია ინფორმაციაში.