სომხეთის თავდაცვის სამინისტრო უარყოფს აზერბაიჯანული მხარის მიერ გავრცელებულ ინფორმაციას, რომლის თანახმადაც, 9 ივლისის საღამოს სომხეთის შეიარაღებული ძალების ქვედანაყოფმა აზერბაიჯანული პოზიციის მისამართით გეღარქუნიქის მხარის სასაზღვრო ზონაში ცეცხლი გახსნა.

„ეს ინფორმაცია არ შეესაბამება სიმართლეს. სომხურმა მხარემ ცეცხლი არ გახსნა და, როგორც უკვე აღვნიშნეთ, აუცილებლობის შემთხვევაში, ეს მოხდება მხოლოდ მოწინააღმდეგის საპასუხოდ“, - ნათქვამია სომხეთის თავდაცვითი უწყების განცხადებაში.

მანამდე აზერბაიჯანის თავდაცვის უწყებამ სომხური მხარე აზერბაიჯანის არმიის პოზიციებისთვის ცეცხლის გახსნაში დაადანაშაულა. მათივე ინფორმაციით, შემთხვევის შედეგად აზერბაიჯანელ ჯარისკაცებს შორის არავინ დაშავებულა ან დაღუპულა.