სამხრეთ აფრიკაში ყოფილი პრეზიდენტის, ჯეიკობ ზუმას დაპატიმრების შემდეგ დაწყებულ არეულობას სულ მცირე 30 ადამიანის სიცოცხლე ემსხვერპლა, - ინფორმაციას BBC-ი ავრცელებს.
გამოცემის ცნობით, პროტესტი ძალადობაში შაბათ-კვირას გადაიზარდა. ქუჩებში სხვადასხვა საგნები დაწვეს, გადაკეტეს მაგისტრალები და ბიზნეს ობიექტები გაძარცვეს.
სამართალდამცავებმა 800 ადამიანი დააკავეს. პოლიციის დასახმარებლად ხელისუფლებამ ქუჩებში სამხედროები განალაგა.
სამხრეთ აფრიკის ყოფილი პრეზიდენტი ჯეიკობ ზუმა, რომელსაც სასამართლოს მიმართ უპატივცემულობის გამოჩენის გამო 15-თვიანი პატიმრობა მიუსაჯეს, პოლიციას რამდენიმე დღის წინ ჩაბარდა. საქმე ეხება მიმდინარე წლის თებერვალში კორუფციის საქმესთან დაკავშირებულ დაკითხვას, რომელზეც ყოფილი პრეზიდენტი არ გამოცხადდა. სამართალდამცავები მაღალი დონის სავარაუდო კორუფციის ფაქტებს იძიებენ, რომელიც ზუმას ხელისუფლებაში ყოფნის დროს, 2009 წლიდან 2018 წლამდეა ჩადენილი.