საფრანგეთის ანტიმონოპოლურმა ორგანომ კომპანია Google-ი 500 მილიონი ევროთი დააჯარიმა, - ინფორმაციას Reuters-ი ავრცელებს.

სააგენტოს ცნობით, უწყებაში განმარტავენ, რომ კომპანიამ არ შეასრულა მარეგულირებლის განკარგულებები, რომელიც ფრანგულ მედია გამოცემებთან მათი მასალების გამოყენების პირობებზე „კეთილსინდისიერი მოლაპარაკებების“ გამართვას ითვალისწინებს.

მომდევნო ორი თვის განმავლობაში Google-მა უნდა წარადგინოს წინადადებები იმასთან დაკავშირებით, თუ როგორ აუნაზღაურებს სააგენტოებსა და სხვა გამომცემლებს მათი კონტენტის გამოყენებისათვის, წინააღმდეგ შემთხვევაში კომპანიას დამატებით ყოველდღიურად 900 000 ევროს ჯარიმის გადახდა მოუწევს.

ახალი ამბების გამომცემლები, APIG-ი, SEPM-ი და AFP-ი Google-ს ადანაშაულებენ და აცხადებენ, რომ კომპანიამ ვერ შეძლო მათთან კეთილსინდისიერი მოლაპარაკებების გამართვა იმისთვის, რომ გამოენახათ საერთო ენა ახალი ამბების შინაარსის ანაზღაურებასთან დაკავშირებით ევროკავშირის ახალი მითითების შესაბამისად, რომელიც ე.წ. "მეზობელ უფლებებს" ქმნის.