უკრაინის პრეზიდენტმა ვლადიმირ ზელენსკიმ შინაგან საქმეთა მინისტრის პოსტზე უკრაინის რადას დეპუტატის დენის მონასტირსკის კანდიდატურა დაასახელა.

უკრაინული მედიის ცნობით, ეს ინიციატივა პრეზიდენტმა პარტია „ხალხის მსახურის“ საპარლამენტო ფრაქციის სხდომაზე წამოაყენა და ამას ფრაქციამ მხარი დაუჭირა.

მანამდე უკრაინის შინაგან საქმეთა მინისტრმა არსენ ავაკოვმა თანამდებობიდან გადადგომის შესახებ განაცხადა. პარლამენტი საკითხს, სავარაუდოდ, ხუთშაბათს უყრის კენჭს. ამ საკითხზე კომენტარი გააკეთა თავად დენის მონასტირსკიმ და აღნიშნა, რომ ეს ყველაზე რთული გადაწყვეტილებაა.

„მესმის რა მსხვერპლზე მივდივარ. თუმცა, როგორც ადამიანმა, პოლიტიკოსმა და პიროვნებამ, ეს არჩევანი გავაკეთე და ამ თანამდებობაზე ვიქნები პრეტენდენტი“, - განაცხადა მან.

მონასტირსკიმ დასძინა, რომ თანაპარტიელებმა პრეზიდენტის შეთავაზებას მხარი დაუჭირეს.