აშშ-ის დასავლეთ შტატებში ძლიერი სიცხისგან გამოწვეულ 60-ზე მეტ ტყის ხანძარს ებრძვიან.

ზოგიერთ ტერიტორიაზე ცეცხლი საცხოვრებელ სახლებს მოედო და ათასობით ადამიანის ევაკუირება გახდა საჭირო.

აქტიური ხანძრების ნახევარზე მეტი არიზონას, აიდაჰოს და მონტანას შტატებზე მოდის. ყველაზე დიდი ხანძარი კი ორეგონში მძინვარებს, სადაც, მედიის ინფორმაციით, ცეცხლი პორტლენდზე ორჯერ დიდი ზომის ტერიტორიაზეა მოდებული. ადგილობრივი სახანძრო სამსახურის წარმომადგენლების ცნობით, ორეგონში ხანძრის შედეგად სულ მცირე 7 სახლი და 40 სხვა შენობაა დამწვარი.

ხანძარი ძლიერმა სიცხემ გამოიწვია. ბოლო დღეებში აშშ-ის დასავლეთ შტატებში ჰაერის ტემპერატურამ რეკორდულ ნიშნულს მიაღწია. კალიფორნიაში, „სიკვდილის ველზე“ 54.4 გრადუსი ცელსიუსი დაფიქსირდა. ექსპერტები ძლიერ სიცხეს კლიმატის ცვლილებას უკავშირებენ.

უწყებათაშორისი სახანძრო ეროვნული ცენტრის მონაცემების თანახმად, ამჟამად აშშ-ში 67 დიდი აქტიური ხანძარია და დამწვარია 1 434 კვადრატულ მილზე მეტი ტერიტორია. ხანძრებს 14 200-ზე მეტი მეხანძრე ებრძვის.