სომხეთ-აზერბაიჯანის საზღვრის ერასხის მონაკვეთზე 14 ივლისს ინციდენტი მოხდა, - სომხური მედიის ინფორმაციით, ამის შესახებ ქვეყნის თავდაცვის უწყებამ განაცხადა.

„აზერბაიჯანის შეიარაღებული ძალების ქვედანაყოფები საინჟინრო ტექნიკის გამოყენებით თავიანთი პოზიციების გამაგრებითი სამუშაოების ჩატარებას შეეცადნენ. ამ სამუშაოების შეჩერების მიზნით სომხური მხარის მიერ განხორციელებული საპასუხო ქმედებების შემდეგ, აზერბაიჯანელმა სამხედროებმა სომხეთის პოზიციებს ცეცხლი გაუხსნეს, რის შედეგადაც სომხეთის შეიარაღებული ძალების სამხედროს სასიკვდილო ჭრილობა მიაყენეს,“- აცხადებენ სომხეთის თავდაცვის უწყებაში.

მათივე ინფორმაციით, მსხვერპლი აზერბაიჯანულ მხარესაც ჰყავს.

„სომხეთის თავდაცვის სამინისტრო მკაცრად გმობს აზერბაიჯანული მხარის ამ პროვოკაციას და აფრთხილებს, რომ მკაცრ პასუხს მიიღებს. სიტუაციის შემდგომ გამწვავებაზე სრული პასუხისმგებლობა აზერბაიჯანის სამხედრო-პოლიტიკურ ხელმძღვანელობას ეკისრება”, - ნათქვამია სომხეთის თავდაცვის სამინისტროს განცხადებაში.