„ევროპის წამლის სააგენტო“ - აგვისტოს ბოლოსთვის „დელტა“ ვარიანტის წილი ევროკავშირში გავრცელებულ კორონავირუსის ყველა ვარიანტს შორის 90% იქნება

ევროპის წამლის სააგენტოს (EMA) განცხადებით, ვაქცინის ორი დოზა კრიტიკულად აუცილებელია კორონავირუსის „დელტა“ ვარიანტის საწინააღმდეგოდ.

ევროკავშირის მედიკამენტების მარეგულირებელი ორგანო ამ საკითხზე განცხადებას ავრცელებს.

„ევროპის წამლის სააგენტო და ევროპის დაავადებათა პრევენციისა და კონტროლის ცენტრი ევროკავშირის მოქალაქეებს მოუწოდებენ აიცრან და დაიცვან ვაქცინირების რეკომენდებული დოზების რაოდენობა. ეს განსაკუთრებით მნიშვნელოვანია კორონავირუსის „დელტა“ ვარიანტის გავრცელების პირობებში“, - წერია EMA-ს მიერ გავრცელებულ ინფორმაციაში.

აქვე აღნიშნულია, რომ „დელტა“ ვარიანტი შეშფოთების მიზეზია, რადგან ის ევროპაში სწრაფად ვრცელდება და პანდემიის კონტროლის ძალისხმევას შეიძლება სერიოზულად შეუშალოს ხელი.

„მტკიცებულებების თანახმად, ის 40-60 პროცენტით უფრო გადამდებია, ვიდრე მანამდე გავრცელებული „ალფა“ ვარიანტი. „დელტა“ შესაძლოა დაკავშირებული იყოს ჰოსპიტალიზების უფრო მაღალ რისკთან. ევროპის დაავადებათა პრევენციისა და კონტროლის ცენტრის გათვლებით, აგვისტოს ბოლოსთვის „დელტა“ ვარიანტის წილი ევროკავშირში გავრცელებულ კორონავირუსის ყველა ვარიანტს შორის 90% იქნება. წინასწარი მტკიცებულებები აჩვენებს, რომ კოვიდ-19-ის საწინააღმდეგო ორდოზიანი ვაქცინების ორივე დოზა საჭიროა „დელტა“ ვარიანტისგან სათანადოდ დასაცავად“, - წერია ევროპის წამლის სააგენტოს განცხადებაში.

რაც შეეხება მეორე დოზით ვაქცინაციისას სხვა მწარმოებლის ვაქცინის გამოყენების საკითხს, ევროპის წამლის სააგენტო და ევროპის დაავადებათა პრევენციისა და კონტროლის ცენტრი აცხადებს, რომ „ამჟამად ისინი არ არიან იმ პოზიციაში, რომ გადაჭრით გასცენ რეკომენდაცია კოვიდ-19-ის სხვადასხვა ვაქცინების დოზების შერევის თაობაზე“.

„ამის მიუხედავად, ესპანეთში, გერმანიაში და დიდ ბრიტანეთში ჩატარებული კვლევების წინასწარი შედეგები მიანიშნებს დამაკმაყოფილებელ იმუნურ რეაგირებაზე და არ აჩვენებს უსაფრთხოების რისკებს. ცოტა ხანში მეტი მონაცემები გვექნება და EMA განაგრძობს მათ გადახედვას, როგორც კი ისინი ხელმისაწვდომი გახდება“, - აღნიშნავენ მარეგულირებელ ორგანოში.

რაც შეეხება ე.წ. „ბუსტერ“ მესამე დოზას, EMA-ში განმარტავენ, რომ ამჟამად ნაადრევია იმის დადასტურება, როდის იქნება საჭირო COVID-19 ვაქცინების მესამე დოზა, რადგან ვაქცინაციის კამპანიებისა და მიმდინარე კვლევების მონაცემები ჯერ კიდევ არ არის საკმარისი იმის გასაგებად, თუ რამდენ ხანს იმოქმედებს ვაქცინების ეფექტი.

ვლადიმერ ფესენკო - უკრაინის გარეშე უკრაინის მომავალზე შეთანხმების ნებისმიერი მცდელობები დამარცხებისთვისაა განწირული
ქართული პრესის მიმოხილვა 26.07.2021
თორნიკე შარაშენიძე - ხელისუფლების სერიოზული შეცდომა იყო ვაშინგტონისთვის არასწორი ინფორმაციის მიწოდებაში აშშ-ს ელჩის დადანაშაულება, შესაძლოა, ეს ამბავი მათ მომავალში ცუდადაც კი დაუბრუნდეთ
საქართველოს რეგიონალური პოზიციონირება ყარაბაღის კონტექსტის გათვალისწინებით: ცალკეული ასპექტები
პირველად საქართველოში - დავით ტატიშვილის სამედიცინო ცენტრში უნიკალური ოპერაცია ჩატარდა
მინერალური წყალი „ბორჯომი“ ახალ კამპანიას იწყებს
„სინერჯი“ თევზის კომპანია „უმალის“ პარტნიორი გახდა